08:01 م
الإثنين 24 يوليو 2023
كتب مصراوي:
حل المنتج أحمد الزواوي ضيفا على “قعدة ستات” مع المذيعة مروة صبري، وخلال اللقاء استقبل البرنامج مداخلة هاتفية على الهواء من متصل يُدعى “أحمد”، تعهد بعلاج الفنانة فيفي عبده وفك السحر الذي يتسبب في مرضها وهاجم المنتج.
وقال خلال المداخلة: “إحنا هناخد الموضوع من زاويتين.. الزاوية الأولى يا أستاذ أحمد إحنا متشكرين جدا عرفنا سبب التعب بتاع مدام فيفي، وإحنا هنحللها الموضوع ومتشكرين جدا ليك إن اتنت عرفتنا هي تعبانة من إيه.. إحنا هنساعدها طالما هو بيقول إن هو عاملها عمل إنها تتعب بسبب الفلوس، فخلاص تمام شكرا إحنا هنساعدها”.
ليرد عليه “الزواوي” قائلا: “نتمنى لها الشفاء على إيد أي حد”.
ليرد عليه الآخر قائلا: “هو كل واحد ليه فلوس عند حد يعمله عمل عشان يرجع له فلوسه؟ هو مفيش طرق قانونية؟ هو ده المنطق ؟”.
ليقاطعه “الزواوي” قائلا: “طالما مش عارف أجيب حقي بالقانون والعرف يبقى أعمل أي حاجة بقى”.
واستكمل “المتصل” وقال: “خلاص أنا هعملك عمل بالمرض النهاردة”، ليرد عليه “الزواوي”: “مفيش مشكلة خالص الحمد لله محصنين.. مفيش حد على وش الأرض يجرؤ يعمل معايا حاجة وده بفضل من عند ربنا.. ربنا يوهبكوا زينا”.
وقال أحمد “المتصل” ردا على سؤال المذيعة مروة صبري إذا كان يقوم بعمل أعمال هو الآخر: “لا أنا بفك بس بفضل الله.. أنا معالج روحاني بالقرآن.. مش مؤذي يعني وهخلي مدام فيفي تتصل بيك بعد ما تخف وهحصنها كمان.. أنا بقول إن بقدرة الله عز وجل فيفي عبده بكرة هتكون ماشية على رجليها”.
ليسخر منه “الزواوي” قائلا: “إيه بفك بس دي؟ ده تخصص في الطب ولا إيه؟ مفيش حاجة اسمها كده.. يالا ربنا يشفيها على إيديك إن شاء الله”.
وأثارت تصريحات المنتج أحمد الزواوي، جدلا واسعا، بعد زعمه اللجوء لما أسماه “علم الفلك” لإيذاء الفنانة فيفي عبده دون ذكر تفاصيل عما فعله.
وقال الزواوي في مداخلة هاتفية ببرنامج “حضرة المواطن” تقديم الإعلامي سيد علي: “في طرق احنا بنستعملها في حالة يبقي فيه حق لينا عند حد مش عارفين نجيبه بالقانون ولا بالأصول”.
واستكمل “والموضوع مالوش علاقة بالسحر بل الفلك ومش أي حد يقدر يعمل الكلام ده وحاولت أخد حقي بشتى الطرق ومعرفتش والنقابة معرفتش تجيب لي حقي حتى الوسطاء اللي تدخلوا معرفوش يجيبولي حقي وكان لازم ألجأ لحاجة بقى نسميها قرصة ودن”.
وأضاف: “فيه متخصصين بيعملوا الكلام ده وكان ليا فلوس دفعة تعاقد على بطولة فيلم كانت 60 ألف جنيه في 2017 وبعد محاولات حاولت أخد فلوسي منها بقيمتها النهاردة والمبلغ مش هيفرق معاها في حاجة لكن هي رافضة تدفعه”.
وانهى حديثه قائلا: “مكانش فيه حاجة بينا خلاص احنا حضرنا للفيلم ومضت وجبنا الأبطال اللي هي رشحتهم معاها، وأول ما كنا هنبدأ تصوير وأكدنا عليها الأوردر وبعد ما حجزت لوكيشن ومعدات لقيناها ما بتردش خالص، وكلمت الدكتور أشرف زكي وقالي تعالى اعمل شكوى في النقابة ومعرفوش يجيبوها يحققوا معاها زي ما جابوني وحققوا معايا ورفعت قضية وكل شوية يتعملها حفظ عشان بتغير عنوانها كل شوية”.
وخلال الحلقة، علق الدكتور عبدالمنعم فؤاد المشرف العام على الأروقة العلمية بالجامع الأزهر، بأن ذلك حرام شرعا، مشيرا إلى أن هذه الأعمال من الشيطان واستدعاء للشيطان نتيجة فقر ثقافي وديني، ولا يصح أن نخرج ونتحدث عن هذه الأفعال في الإعلام .
وحذر من نشر هذه الثقافة، وخاصة بين الشباب، مؤكدا على ضرورة اللجوء للقانون والقضاء لحل هذه الخلافات.
وكانت الفنانة فيفي عبده تحدثت منذ أيام عن تفاصيل حالتها الصحية وعن العملية التي أجرتها، وقالت خلال لقائها ببرنامج ET بالعربي: “أكيد مليون في المية معمولي عمل متحركش من السرير لو أعرف مين اللي عملي العمل ده أبوس رجله يفكهولي، عشان حرام عليك أفضل في السرير وكل ما أقوم من حاجة الاقي حاجة”.
