09:15 م
الإثنين 21 أغسطس 2023
القاهرة مصراوي:
أبدى الإعلامي ممدوح موسى اندهاشه من انتشار شائعة وضع “الزعيم” عادل إمام، تحت الإقامة الجبرية من قِبل أسرته، ومنعه من الخروج أو مقابلة الأصدقاء، والتي انتشرت بسبب تصريحات منسوبة للفنانة مادلين طبر.
وكتب ممدوح عبر حسابه الرسمي على موقع “فيسبوك”: “أنا مستغرب جدا من الكلام اللي بيتقال عن عادل إمام إن أولاده عاملين إقامه جبرية عليه، كلام غريب جدا، علاقتي بعادل إمام علاقة قديمة جدا قبل ولادة محمد عادل إمام بسنتين وأعرف مدام هالة الشلقاني كويس وأعرف إنها ست محترمة جدا وهي بعد ربنا سبب في وصول عادل إمام لما هو فيه لأنها كانت ومازلت بتحافظ علي بيتها وأولادها”.
وتابع “ومربياهم أحسن تربية وأنا شايف ده وعشته والأستاذ عادل قاعد وبيشوف أصحابه وذاكرته حديد وكمان دمه أخف من الأول، بس هو فعلا عايز يرتاح لأنه مش هيقدر على زحمة الناس ولمتهم عليه لو راح فرح أو عزاء أو تكريم، الراجل عمل كل حاجة ويستحق أن يرتاح ويعيش لأحفاده بعد أن اطمأن على أولاده والحمد لله كل واحد ممتاز في مجاله وحياته تحت إشراف الأم التي تعبت وربت لأن الأستاذ كان مشغول طول عمره. برجاء بلاش أي حد يفتي ويخترع كلام مش مظبوط”.
كان الفنان أشرف زكي نقيب المهن التمثيلية علق على التصريحات المنسوبة للفنانة اللبنانية مادلين طبر حول الزعيم عادل إمام ومطالبتها عائلته بالإفراج عنه، وذلك في مداخلة هاتفية مع الإعلامية بسمة وهبة ببرنامج “90 دقيقة” والذي يعرض على قناة “المحور”.
وعلق أشرف زكي قائلاً: “أنا عاوز الأول أطمن الناس وأقول الحقيقة كاملة على مسؤوليتي الزعيم عادل إمام بحالة جيدة جداً وأنا من أيام قليلة جداً اتصلت بيه وهحكيلك المكالمة، أنا اتكلمت قالي أهلاً يا أشرف أخبارك إيه؟، قولت له ازيك يا زعيم واحشنا، قالي طالما أنا واحشك ما تيجي تعالي، واطمن وسأل على أسرتي بالأسماء ومقفلش غير لما سألني هتيجي امتى قولت له هخلص المهرجان وأجيلك”.
واستكمل: “أستاذ رامي إمام والأستاذ محمد عادل إمام كانوا بيعملوا فيلم اسمه أبو نسب وكانوا بيربطوا الليل بالنهار عشان يخلصوا الفيلم وأنا بكلمك لأن بنتي مساعد مخرج في الفيلم والأستاذ رامي أنا عمري في حياتي ما كلمته والراجل اتأخر عليا، بعد ما بيخلص تصوير بيكلمني وقابلته روحنا من كام يوم قاعدين في كافيه في الصحراوي، والراجل بيرد لكن ممكن يبقي عنده تصويره حضرتك مثلاً لما بتطلعي في البرنامج أكيد مش هتردي على التليفونات، ده راجل بيصور 10 ساعات 12 ساعة في اليوم”.
وأنهى حديثه قائلاً: “لم أسمع من قبل شكوي أن أستاذ رامي إمام مبيردش على حد وهو لما بيكون بيصور أكيد مش هيرد، وبعدين لو في حاجة مهمة وعاوز أستاذ رامي وهو ميعرفنيش هبعت له رسالة وأقوله عاوزك في حاجة والراجل بيكلمني على طول لكن مبيكلمنيش وهو في وسط التصوير، وكلام مادلين طبر خطير جداً وميتقالش على أي فنان ما بالك بالزعيم فأنا شخصياً بعتذر عن ما جاء في هذا البوست، وأنا هتكلم مع الفنانة مادلين طبر ومرة أخيرة أنا بعتذر عن ما جاء في هذا البوست”.
