12:10 ص
الأربعاء 13 سبتمبر 2023
كتبت منى الموجي:
استقبلت سينما ڤوكس في مول مصر، العرض الخاص لفيلم “ڤوي ڤوي ڤوي” بحضور أبطاله وصناعه، وعقب انتهائه أقيمت ندوة لاستقبال أسئلة الصحفيين والحضور.
وحضر الندوة النجم محمد فراج، المنتج محمد حفظي، مؤلف ومخرج الفيلم عمر هلال، الفنان طه دسوقي، الفنان محمد عبدالعظيم.
وقال محمد فراج “بعد حلاوة الحدوتة، بركز في الشخصية بتاعتي، وكان حاجة مهمة جدا إن حسن الشخصية التي يقدمها بالفيلم يكون بيعرف يلعب كورة وده مكانش صعب بالنسبالي لأن دي حاجة بعملها من وأنا عيل صغير، التحدي الأكبر إن فقدان البصر إما البني آدم بيتولد كده او مبصر ويفقد بصره، الحالة اللي بنقدمها لشخص بيشوف وبيمثل انه مش بيشوف والمفروض الناس تصدقني، وكان الموضوع مغري جدا”.
وتابع “ثانيا جذبني الإطار الخاص بكرة القدم للمكفوفين لان العين لم تراه كثيرا في الدراما ولم نغوض بداخلها، التجربة بالنسبالي مهمة جدا”.
وقال المنتج محمد حفظي في الندوة “تم تصوير الفيلم في مصر ولبنان ورومانيا، والعمل عليه استغرق حوالي ٤ سنين”.
وأضاف “عمر ميعرفش الموضوع ده كنت بفكر إزاي اعتذر بشياكة لأنه صاحبي، لكن حبيت الموضوع، وإن الناس كلها بتتكلم جد فيه لكن هيتم تناوله بشكل ممتع وسلس، وخدنا وقت عشان نبني المشروع”.
وقال المخرج عمر هلال “بعد تجربة إخراج في الاعلانات لمدة عشرين سنة، بقدم أول فيلم لي، اتأخرت بس كنت كتبت سيناريو في ٢٠٠٥ لم يحالفه الحظ، وكل تأخيرة وفيها خيرة”.
وأضاف “تخيلت نيللي كريم ومحمد فراج على الورق، ربنا كان عايز الدنيا تتعطل عشان يكون معايا هذا الرجل العظيم، وان نيللي توافق، وفراج طلع بيعرف يلعب كورة فعلا”.
جدير بالذكر أن فيلم ڤوي ڤوي ڤوي تدور أحداث في إطار كوميدي، حول شاب ينضم لفريق كرة قدم للمكفوفين، وينجح في خداع كل من حوله، وخلال الأحداث يمر بالعديد من الظروف، وتضم بطولة العمل كلا من: محمد فراج، نيللي كريم، بيومي فؤاد، طه دسوقي، والعمل من تأليف وإخراج عمر هلال.
