10:42 م
الأحد 09 يوليو 2023
رد الفنان رامي صبري على اتهام عمرو مصطفى له بسرقة لحن أغنية “يمكن خير” من أغنية “رقصة”.
وقال خلال لقائه ببرنامج أجمد ٧ مع جيهان عبدالله عبر نجوم إف إم: “أنا عشان فيه بيني وبينه عشرة مش هتكلم بطريقته .. هو قال إني سرقت وأعتقد إنه لو يعرف رامي صبري كويس هيعرف إنه مسرقش والفنان المبدع الحقيقي مبيسرقش في فرق بين السرقة وتوارد الأفكار بمعنى إني ممكن أجبلك دلوقتي ١٠ ألحان في منهم جملة شبه التانية”.
وأضاف: “يعني أنا مثلا زمان عملت أغنية للفنان عامر منيب اسمها “ ده مكانش حب وهندم ليه؟” بعدها بسنة عمرو دياب عمل أغنية الملحن بتاعها محمد يحيى بتقول أي حاجة تيجي من ريحة الحبايب.. و ده مش عيب وأنا ساعتها مطلعتش قولت أنا هتخانق مع محمد يحيى وهرفع قضية”.
وأردف: “الكلام الكبير اللي عمرو مصطفى قاله ده كلام يدينه كلمة سرقة دي عيب لما ملحن كبير زي عمرو مصطفى يطلع يقول على فنان تاني ملحن مش صغير ومطرب مش صغير ومكانته مش صغيرة في هذا الوسط ويتكلم عنه بشكل مش حلو”.
واستكمل: “هو مشكلة عمرو مصطفى مش أغاني لأن لو حد فينا سرق حاجة من عمرو مصطفى هيقاضيه وهياخد حقه بالقانون لأنه كلية حقوق وأنا معهد موسيقى عربية قسم تأليف موسيقي فلما تيجي تتكلم عن متخصص وأنت كلية حقوق لازم تبقى عارف إنت بتتكلم عن مين متقولش أي كلام كده”.
وأردف قائلا: “وأنا لو ركزت معاه هيتحاسب قانونيا يعني أنا بس مكبر دماغي واللي يهمني الشغل وأطلع ملك الفرفشة وأبقى لذيذ أنا بحب الطريقة دي إنما عمرك شوفتيني بطلع أتخانق أو برد على حد؟ وعمري هرد عليه بطريقته”.
وأضاف موجها رسالة إلى الفنان والملحن عمرو مصطفى: “هقوله ربنا يهديك .. واشتغل واعمل حاجات جديدة زي الملحنين الكبار زمايلك اللي بيشتغلوا دلوقتي ركز في شغلك أكتر واعملنا أغاني حلوة وأنا شخصيا لو عملتلي أغنية هغنيها ومعنديش أي مشكلة معاك إنما الكلام اللي قولته كلام صغير عيب يطلع من واحد كبير زيك.. السرقة دي إني آخد حاجة من ١ ل ١٠ ولو حد اتسرق منه حاجة مبيسكتش.. أنا لما قعدت وركزت معاه اكتشفت إن هو مش على حق كقانون مش حقه إنه يطلع يقول ده سرق مني”.
واختتم حديثه قائلا: “هو عمرو مصطفى لما بيغير من نجاح بيطلع يخبط في الناس مفيش حد فينا عجبه خالص كلنا واقعين ومبتعملش أغاني حلوة وكلنا أغانينا مسروقة منه .. أنا اتضايقت منه جدا على فكرة لأن أنا مبحبش التقليل من قيمة الناس ممكن تقول إني مبعجبكش أو أغانيه وحشة أو مش نجم تمام ده رأيك إنما تطلع تقول إنت سرقت مني دي كلمة كبيرة أنا راجل دارس موسيقى ومتخرج من المعهد العالي للموسيقى العربية زي عمر خيرت وياسر عبد الرحمن موسيقار يعني ومش هعمل اعلانات ومش هتكلم عن نفسي كتير .. الأستاذ مش زي الطالب مش هتسأل رامي صبري ده دارس إنما هو بيتكلم غلط أنا لو راجل عندي مشاكل نفسية مكنتش خليته يشتغل تاني إنما أنا مهذب ومحترم ومتربي كويس”.
