02:59 م
السبت 17 يونيو 2023
تحدث المطرب تامر عاشور، عن الفنانة هيفاء وهبي ومايا دياب، ورأيه في لقب صوت مصر، وموقفه من دخول ابنته الوسط الفني، وأزمته مع سارة الطباخ وسبب المشكلة، وغيرها .
نستعرض لكم أبرز تصريحات تامر عاشور ببرنامج “حبر سري” في السطور التالية:
هيفاء لها شكلها التي تتميز به في الأداء وهي عارفة ده كويس ومستحيل تزعل لأنها مؤدية وده يختلف عن المغني.
هيفاء وهبي مؤدية مش مطربة، وأنا اشتغلت مع هيفاء وعملتلها أغنية “صباحو ورد” .
معرفش أغاني لـ مايا دياب ولا أغنية.
تفاخرت لما دخلت الجيش لكن مقلتش أني المطرب المشهور وكنت بحاول أهرب من التجمعات في مركز التدريب وفي ناس اكتشفتني واللي عرفوني بدأوا يسعدوني وكنت بعمل كده عشان مش عايز مشاكل.
بنتي بتغني وصوتها حلو قوي لكن لا أتمنى دخولها عالم الفن ولو كبرت وحبت تكون فنانة أو مطربة مش هوافق ودي بتبقى موهبة وهو اختيارها في النهاية ولكن هبقى رافض.
أرفض دخول بنتي عالم الفن لأن الوسط الفني له متاعب كثيرة من سهر وتعطيل عن الدراسة.
كان في خلافات بيني وبين محسن جابر لكن هو أب روحي للفن المصري وخرجت من المشكلة منتصر وممكن أرجع في أي وقت أشتغل معاه تاني وصوت الفن بيتي.
تحدث عن الخلاف بينه وبين المنتجة سارة الطباخ قائلاً: “كنا مضينا عقد على أساس خطة معينة، وكان عندها فجأة حمية إنها تعمل ألبوم، وإتكلمنا وجيبنا محامي، وطلعت الفكرة بالنسبة لها واهية، زي ما هي لها أفكار كتيرة واهية في كل الحاجات”.
قلت عن سارة الطباخ مرة، إنها منتجة الفنكوش، وفوق أي فنكوش ممكن أي حد يتخيله، وتزعل عادي براحتها كان غيرها أشطر.
عن سبب مشكلته مع سارة الطباخ، فقال: “بعد ما وقعنا العقد مفيش حاجة منه تم تنفيذها، وأول ما بدأت أشوف شغلي بدأت تقاضيني، كإنها ماضية عقد معايا أو أنتجت لي ، والنقابة تدخلت وعارفة كل كلمة بقولها، هي مضت عقد لم تلتزم به ، ومن رحمة ربنا عليها إني مكملتش معاها في إجراءات القضية”.
عن رأيه في لقب صوت مصر: “شيرين أكتر صوت جبار في الوطن العربي، لكن أنغام ملتزمة أوي وده أنا عاشرته واللي تفوز بلقب صوت مصر هي الملتزمة أنغام”.
لو حد هديله لحن من ألحاني ممكن يبقى عمر كمال، لأن هو اللي بيغني، وحمو بيكا حبيب قلبي ولكن إحنا بنتكلم في ألحان وغناء.
