محمد الشرنوبي لـ شيرين عبد الوهاب: مستمتعين بصوتك
فاجأ محمد الشرنوبي جمهوره ومتابعيه من خلال مقطع فيديو شاركه عبر حسابه الشخصي على “إنستغرام”، وجه من خلاله رسالة إلى النجمة شيرين عبد الوهاب قال فيها: “بخصوص موضوع شيرين أنا مش فارق لي أي حاجة غير إني سمعت صوتك، وإن إحنا كجمهورك مستمتعين بصوتك، ويارب المشكلة اللي بينك وبين روتانا تخلص في أسرع وقت؛ عشان نعرف نسمع صوتك بشكل طبيعي، وتاخد حقها اللي المفروض تاخده”.
وأكمل الشرنوبي: “الحقيقة إن أنا أكتر حد في الفترة دي ممكن يبقى حاسس بشيرين، لأن بقالي 5 سنين في قضايا ومشاكل مع سارة الطباخ في الشركة اللي كنت ماضي معها، ومن سنتين وكام شهر بالظبط يوم 24 مايو 2022، طلع حكم بانتهاء عقدي، وطلعت الشركة تقول لأ، وأنا طلعت أقول آه”.
وتابع: “لحد ما طلع 3 أحكام تأكد إن العقد انتهى خلاص وإننا معنديش أي التزامات بأي شركة إنتاج، وأكتر حاجة بتثبت إني بمثل بشكل طبيعي وماضي مع شركة من أهم شركات الإنتاج في الوطن العربي، وهي شركة مزيكا للمنتج محسن جابر ومحمد جابر، ودي شركة كبيرة وعندها شؤون قانونية وعندها ناس بتراجع ورق اللي بيشتغل معاهم، خصوصاً لو حد من الناس دي عنده مشكلة قانونية معروفة للرأي العام، فالناس دي اتأكدت إن كل حاجة انتهت، وإني معنديش أي التزامات لأي شركة تانية، وبناءً عليه مضينا مع بعض وابتدينا نشتغل، ونزلنا كذا أغنية”.
يمكنكم متابعة: رغم أزماتها المتكررة.. ابنة شيرين عبد الوهاب تحدث لها مفاجأة
وأكمل محمد الشرنوبي: “المشكلة اللي بتواجهنا دلوقتي إن الأغاني بتفضل موجودة على كل المنصات؛ لأن موقفنا سليم، ولكن فيه ثغرة في قانون يوتيوب مش عارفين، نتعامل معاها، لأن الثغرة دي معمولة علشان تحمي حقوق الناس، وهي لما بنزل فيديو على يوتيوب، بيتحجب واليوتيوب بيدي مهلة للي عمل طلب إلغاء الأغنية 10 أيام عشان يرفع قضية ولو رفع قضية بندخل في سنة”.
وأوضح: “والثغرة دي هي استغلتها في أغنية “قلبي ارتاح”، نزلتها وبعدين اتحجبت، ورفعت قضية وكسبتها ورجعت، اتكررت كذا مرة في أغنية “ايه اللذاذة دي” وفي “إنتي الحياة”، وكل الحاجات دي اتشالت ورجعت، وآخر مرة حصلت كانت في أغنية “استغنينا” ولسه القضية مخلصتش؛ فلسه الأغنية مرجعتش على يوتيوب بس موجودة على باقي المنصات، المهم أنا مش عارف آخرة اللي بيحصل دا إيه بس في النهاية أنا مكمل، وهنزل أغنية يوم الأربعاء ويا رب تعجبكم ومش هسكت عن حقي، ومش هسيب حد يتعدى على حقي إني أغني وأبقى معاكم دايماً”.
وأضاف: “أنا بقالي أربع سنين بشتغل، وعملت فيهم 30 أغنية وحاجات حلوة مش عايزة أنزلها وأحرقها علشان متتشلش، بس الفترة الجاية كل فترة هنزلكم أغنية علشان دايماً نبقى مع بعض”.
آخر أعمال محمد الشرنوبي
يُذكر أن آخر أعمال محمد الشرنوبي، أغنية “استغنينا”، التي طرحها خلال الفترة الماضية عبر قناته على موقع الفيديوهات يوتيوب، ومختلف منصات الموسيقى الرقمية، والأغنية من كلمات وألحان عزيز الشافعي، وتوزيع إلهامي دهيمة.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوغراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
