أكد الفنان محمد رجب، أنه كاد أن يعتزل العمل الفني بعدما حصره المخرجون في شخصية الفتى الشرير، وأبدى حزنه على فشل فيلمه “بيكيا”، وأشار إلى أن تحوله لتقديم المسلسلات سنوياً، كان تغييراً جذرياً في مشواره الفني، وقال إنه عمل كومبارس لفترة طويلة وتحمل الإهانة، حتى اكتشفته المخرجة إيناس الدغيدي.
أضاف محمد رجب خلال حواره ببرنامج «حبر سري»، مع الإعلامية أسما إبراهيم: “في فترة كبيرة اشتغلت فيها كومبارس واتبهدلت لغاية ما إيناس الدغيدي شافتني بعد رحلة يأس كبيرة وكانت شافت صورة ليا”.
وتابع قائلاً: المخرجة إيناس الدغيدي أعجبت بصورتي وطبقة صوتي، وقالت لي عايزاك معايا في فيلم وكنت أول اكتشاف مع هند صبري وأحمد عز في فيلم “مذكرات مراهقة”.
وواصل قائلاً: “لم أهتم قوي بالدور ولكن كنت عايز أخذ خطوة بعد رحلة عذاب ومهانة ولكن مع تكرار دور الشرير كان في نظرة للناس ليا أني شرير وكنت مش بحب كده، ومقوماتي النفسية مش قادر أتقبل الكراهية المطلقة، وتوقفت ومكنتش عايز أكمل كده ونجحت في كل أدواري وظهوري لدور الشرير كان ناتج عن اعتذارات ناس”.
وعن معاناة مهنة الكومبارس قال محمد رجب: “في ناس معندهاش أدمية كنت دارس ومتعلم ومعايا شهادة مهندس ديكور بس كنت بنكر ده عشان أشتغل كومبارس، وكنت بهرب من أهلي وبتنكر، عيشت تجارب سيئة”.
محمد رجب: أنا نجم سينما
وقال محمد رجب: “أنا نجم سينما وبعتبر الدراما مهنة تانية خالص وكنت بخاف أدخلها الأول ودخلت وبعدها وقفت وبعد كدة بقى كل سنة بقى عندي مسلسل من 2018، بعد ما كلمني مخرج وقالي ايه رأيك تجهزلي حاجة للسيزون وقابلت أحمد عبد الفتاح واخترت الأخ الكبير، وبقيت مقرر إن هنزل في الأوف سيزون ومبكترسش ان هي تبقى بنجم رمضان ولا أوف سيزون، أنا راضي رضا كامل على هذا النجاح، التوقيت ده كان توقيت ميت نزلت فيه نجحت، وحقق إيرادات كويسة كإعلانات فاتثبت فيه”.
وكشف محمد رجب عن سبب تكرار تقديمه أدوار الشر وقال: “جالي في البداية كذا دور كنت فيه شرير وعنيف، لدرجة إن الناس بقوا يكرهوني وكل أما أنجح أكتر كل أما كانوا يكرهوني أكتر، لحد ما عملت الباشا تلميذ وكنت بسمع شتيمتي من الناس في السينما لحد اللحظة الأخيرة في الفيلم أما ساعدت كريم عبد العزيز والناس كلها سقفت اللحظة دي كانت بريق الأمل أن الناس تتقبلني في حاجات تانية تعبت جداً ومكانش بيجيلي شغل، لحد مسلسل مع يسرا وكان دوري لا يتعدى الـ 6 حلقات لكن يسرا طلبت إني أكون معاها لأخر المسلسل ومن هنا بقيت محمد رجب”.
وعن فكرة فيلم “بيكيا”، فقال محمد رجب: “كنت مستوحيها من المستشفى وقت ما بابا كان موجود فيها، والفيلم مخدش فرصته إنه يكون موجود في السينما وأنا وقتها استسلمت، ونمت وقولت ان الله لا يضيع أجر من أحسن عملاً، وجالي مكالمة من حسام شوقي وروحت مضيت معاه 3 مسلسلات وكل مسلسل نجح نجاح أقوى من التاني، كان طوق نجاة للحياة من جديد”.
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
